Wednesday, December 31, 2014

2014- ഒരു തിരിഞ്ഞു നോട്ടം

എന്‍റെ ഇത് വരെയുള്ള ജീവിതത്തിലെ ഏറ്റവും പ്രധാനപ്പെട്ട വര്‍ഷമാണ്‌ ഇന്ന് പടിയിറങ്ങുന്നത്.. വര്‍ഷാന്ത്യം പുതുവര്‍ഷം എന്നൊക്കെ പറയുന്നത് വീട്ടിലെ ചുമരിലെ ആണിയില്‍ തൂങ്ങിയാടുന്ന കലണ്ടര്‍ നോട്ടു പുസ്തകം പൊതിയാനുള്ള പേപ്പറായി പരിണാമം സംഭവിക്കുന്ന സ്വാഭാവിക പ്രക്രിയ മാത്രമാണെങ്കിലും, ഓര്‍മ്മകളെ വാര്‍ഷികാടിസ്ഥാനത്തില്‍ അക്കമിട്ടു വേര്‍തിരിച്ചു വച്ചു കഴിഞ്ഞാല്‍, ഇക്കഴിഞ്ഞ ഇരുപത്തൊന്‍പതു വര്‍ഷങ്ങളില്‍ 2014 എന്നത് പട്ടു കച്ചയണിഞ്ഞു തിലകം ചാര്‍ത്തി കിരീടം വച്ച് ചെങ്കോലുമേന്തി തലയുയര്‍ത്തി നില്‍ക്കും എന്‍റെ ഓര്‍മ്മകളില്‍.

ഊരുതെണ്ടി നടക്കുന്നതിനു അച്ഛന്റെയും അമ്മയുടെയും വായില്‍ നിന്ന് കണക്കിന് കേട്ടിട്ടും നന്നാവാതെ അന്സു എന്നാ ഓണ്‍ലൈന്‍ സൗഹൃദവുമായി ചേര്‍ന്ന് ഊരുതെണ്ടികളുടെ വഴിയമ്പലം എന്ന പേരില്‍ ഫേസ്ബുക്ക്‌ ഗ്രൂപ്പ് തുടങ്ങിയത് അതിനു മുന്‍പത്തെ വര്‍ഷമായിരുന്നെങ്കിലും ആ കൂട്ടായ്മ്മ വളര്‍ന്നു കെട്ടുറപ്പ് വന്നത് ഈ വര്‍ഷം ആയിരുന്നു.. യാത്രകളും സൗഹൃദങ്ങളും ആഴവും പരപ്പും കൈവരിച്ച് ഇക്കഴിഞ്ഞ വര്‍ഷം മുഴുവന്‍ നിറഞ്ഞു നിന്നു..!! ലവ് യൂ ഡിയര്‍ തെണ്ടീസ്...!!

"ഇവനിങ്ങനെ തെണ്ടി നടന്നാല്‍ എങ്ങനെ ശരിയാവും, പ്രായം ഇത്രയൊക്കെ ആയില്ലേ...ഒരു ഉത്തരവാദിത്തമൊക്കെ വേണം..!!" 
അങ്ങനെ ഉത്തരവാദിത്തം എന്നാ സാധനം വിവാഹമെന്ന ചടങ്ങിലൂടെ കിട്ടും എന്ന് വിശ്വസിച്ച എന്റെ വീട്ടുകാര്‍ ആ കടുംകൈ ചെയ്തു..!! ഇക്കഴിഞ്ഞ മാര്‍ച്ചില്‍ രേഷ്മയുമായി അവര്‍ എന്നെ കൂട്ടി മുട്ടിച്ചു (ആ മുട്ടലില്‍ ഇതുവരെ ആര്‍ക്കും പരിക്കുകള്‍ ഇല്ല), ഏപ്രിലില്‍ നിശ്ചയം, സെപ്റ്റംബറില്‍ കല്യാണം...!! എല്ലാം ശടപടെ ശടപടെ ന്ന് കഴിഞ്ഞു..!! എന്റെ ജീവിതത്തിലെയും മനസിലെയും ഏറ്റവും പ്രാധാന്യമുള്ള സ്ഥാനം രേഷ്മ കയ്യേറി കുടില്‍ കെട്ടി താമസിച്ചത് ഈ കഴിഞ്ഞയാന്‍ പോവുന്ന വര്‍ഷത്തില്‍ തന്നെ..!!

ഒന്നില്‍ പിഴച്ചാല്‍ മൂന്ന് എന്നാണല്ലോ...!! മൂന്നാമത്തെ കമ്പനിയില്‍ ജോലിക്ക് കയറിയതും 2014 ല്‍ തന്നെ..!!

ഹിമാലയത്തില്‍ പോവണം..!! യാത്ര ചെയ്യാന്‍ തുടങ്ങിയ കാലം മുതല്‍ ഉള്ള ആഗ്രഹങ്ങളില്‍ മുന്‍പന്തിയില്‍ ഉണ്ടായിരുന്ന മോഹം..!! ആഗ്രഹം പരിപൂര്‍ണ്ണമായി എന്ന് പറയാന്‍ കഴിയില്ലെങ്കിലും ഹിമാലയം എന്നാ അത്ഭുതം അടുത്ത് കാണാന്‍ ഭാഗ്യം സിദ്ധിച്ചത്‌ കല്യാണം കഴിഞ്ഞു നടത്തിയ മധുവിധു യാത്രയില്‍ ആയിരുന്നു..!!

പെണ്ണൊക്കെ കെട്ടിയില്ലേ, ഇനി തലയ്ക്കു മീതെ ശൂന്യാകാശം എന്ന് പറഞ്ഞു നടന്നാല്‍ ശരിയാവില്ല.. രേഷ്മയുടെ നിര്‍ബന്ധത്തില്‍, ബാംഗ്ലൂര്‍ നഗരത്തില്‍ സ്വന്തമായി ഒരു കൂര എന്ന നേട്ടവും 2014 ന്‍റെ അക്കൗണ്ട്‌ പുസ്തകത്തില്‍ ഇടം നേടി..!! അങ്ങനെ അവളെന്നെ ആന്ത്ര ബാങ്കിന് കടപ്പെട്ടവനാക്കി..!! 

കല്യാണം, ജോലി, വീട്, യാത്ര, സൗഹൃദങ്ങള്‍ അങ്ങനെ സൗഭാഗ്യങ്ങള്‍ വാരിക്കോരി തന്ന 2014, നിന്നോട് വിട..!! നിനക്ക് പുറകെ വരുന്നത് ഇതിലും ഗംഭീരമായതാവട്ടെ (അത്യാഗ്രഹം)..!!  

1 comment:

Dileep Nayathil said...

All the best in the new year