ഏഴു വര്ഷമായി കര്ണാടകയില് താമസിക്കുന്നു, എന്നിട്ടും ഹംപിയില് പോയിട്ടില്ല എന്ന ചീത്തപ്പേര് മാറ്റാന് തന്നെ ഞാന് തീരുമാനിച്ചു... ഒറ്റയ്ക്കുള്ള ഒരു അലച്ചില് ആയിരുന്നു ആദ്യം മനസ്സില്, പക്ഷെ കുറച്ചു കൂട്ടുകാര്ക്ക് കൂടെ വരാന് താല്പര്യം ഉണ്ട് എന്നറിഞ്ഞത് കൊണ്ട് ദിവസവും സമയവും എല്ലാം മുന്കൂട്ടി നിശ്ചയിച്ച ഒരു യാത്രയായി അത് മാറി...!! ശനിയാഴ്ച്ച പുലര്ച്ചക്ക് ഇറങ്ങാന് തീരുമാനിച്ചു... കൂടെ വരാമന്നേറ്റ രണ്ട് പേര് തലേന്ന് രാത്രി തന്നെ വരാന് കഴിയില്ല എന്നറിയിച്ചു... എന്തായാലും നിശ്ചയിച്ച യാത്ര മാറ്റാന് ഭാവമില്ല, അതുകൊണ്ട് ഉള്ളവരുമായി യാത്ര പോവാന് തീരുമാനിച്ചു, പ്രമോദ് എന്ന സഹമുറിയന്, പിന്നെ പഴയ സഹമുറിയന് ഹരീഷ്... പുലര്ച്ചക്ക് തന്നെ ഹരീഷിന്റെ കാറില് ഞങ്ങള് യാത്ര തുടങ്ങി...!!
പോവുന്ന വഴിയില് ഭക്ഷണം കഴിച്ചു, നല്ല അറുബോറന് ഭക്ഷണം, കഴുത്തറുപ്പന് വില, കട നടത്തുന്നത് മലയാളികളും...!! യാത്ര തുടര്ന്നു, ചിത്രദുര്ഗ്ഗ വരെ നല്ല റോഡുണ്ട്, നാലുവരി പാത തന്നെ... പക്ഷെ പിന്നെ കഥ മാറും.. !! വാരിക്കുഴി പോലുള്ള ഗര്ത്തങ്ങള് റോഡിന്റെ നടുക്കുതന്നെ സ്ഥാനം കണ്ടെത്തിയിരിക്കുന്നു...!! അതില് ഇറങ്ങിയും കയറിയും വട്ടം പിടിച്ചും ഒക്കെ വേണം ഹോസപെട്ട് വഴി ഹംപിയിലേക്ക്..!! വഴി നിറയെ വലിയ ലോറികള് വരി വരിയായി പോവുന്നു.. അതിനിടയിലൂടെ ഉള്ള ഡ്രൈവിംഗ് വലിയ സുഖമൊന്നും തോന്നിയില്ല..!! വഴിയരികില് കണ്ടു തുടങ്ങിയ പാറക്കൂട്ടങ്ങളും കരിങ്കല് മണ്ഡപങ്ങളും ഹംപി എത്താറായി എന്ന ലക്ഷണം കാണിച്ചു..!!
വണ്ടി പാര്ക്ക് ചെയ്ത് ആദ്യം പോയത് അവിടത്തെ ഗണേശ ക്ഷേത്രത്തിലേക്കായിരുന്നു..!! അതിനോട് ചേര്ന്ന് ഒട്ടനവധി മറ്റ് ക്ഷേത്രങ്ങളും ഉണ്ട്... എല്ലാം ഒരു പറക്കുന്നിനു മുകളില് പലയിടത്തായി ചിതറി കിടക്കുന്നു...പാറക്കുന്നിനു അപ്പുറം പ്രസിദ്ധമായ വീരുപക്ഷ ക്ഷേത്രം..!! അതിന്റെ ഗോപുരം നല്ല ഉയരത്തില് തന്നെ കാണാം..!! ഹംപിയില് സ്ഥിരമായി ഇന്ന് പൂജ നടക്കുന്നത് വീരുപക്ഷ ക്ഷേത്രത്തില് മാത്രമാണ്... ഗണേശ ക്ഷേത്രവും മറ്റും ചുറ്റി നടന്നു ഫോട്ടോ എടുത്തു ഞങ്ങള് വീരുപക്ഷ ക്ഷേത്രത്തിലേക്ക് നടന്നു...!!
പോവുന്ന വഴിയില് സന്യാസികളുടെ വേഷമിട്ട മൂന്ന് പേര്, വിദേശികള് അവരുടെ കൂടെ നിന്ന് തൊഴുതു ഫോട്ടോ എടുക്കുന്നുണ്ടായിരുന്നു..!! ഹംപിയിലെ സന്ദര്ശകര് കൂടുതലും വിദേശികള് ആയതുകൊണ്ട് തന്നെ അവരെ കൗതുകപ്പെടുത്താന് ഇത്തരം ഒരുപാട് കാഴ്ചകള് ഇവിടെ ഉണ്ട്... കപട സന്യാസികളുടെ ഫോട്ടോ ദൂരെ നിന്നെടുത്ത് ഞങ്ങള് ക്ഷേത്രത്തിനു അകത്തേക്ക് നടന്നു... ക്ഷേത്രം ദര്ശനത്തിനും ഫീസ് ഉണ്ട്... 3 രൂപ, പക്ഷെ കടുത്തത് ക്യാമറ ഫീ ആണ്, 50 രൂപ..!! നമ്മളെയും പിഴിഞ്ഞു...!! 50 രൂപ കൊടുത്ത് ഫോട്ടോ എടുക്കാന് മാത്രം ഒരു കോപ്പും അതിനകത്തില്ല എന്നതാണ് വാസ്തവം...!! എന്തായലും കാശ് കൊടുത്തതല്ലേ എന്ന് കരുതി അവിടെയും ഇവിടെയും എല്ലാം ഫോട്ടോ എടുത്തു.. അമ്പലത്തിലെ പൂജാരി കൂട്ടമണി അടിച്ചു ആളുകളെ അകത്തേക്ക് ആകര്ഷിക്കാന് ശ്രമിക്കുന്നുണ്ടായിരുന്നു.. പോക്കറ്റിലെ കാശില് തന്നെ അവരുടെയും കണ്ണ്..!! അതുകൊണ്ട് തന്നെ ശ്രീകോവിലിനു അടുത്ത് പോവാന് പോലും എനിക്ക് മനസ്സ് വന്നില്ല..!!
വിനോദയാത്രക്ക് വന്ന കുറെ സ്കൂള് കുട്ടികള് ശബ്ദമുണ്ടാക്കി അവിടെ ഓടി നടക്കുന്നുണ്ടായിരുന്നു... വീരുപക്ഷ ക്ഷേത്രത്തില് ഒരു അത്ഭുദമുണ്ട്, അവിടെ ഒരു ഇരുട്ട് മൂലയില് പുറത്തുള്ള ഗോപുരത്തിന്റെ തലമറിഞ്ഞുള്ള നിഴല് കാണാം...!! മിടുക്കനായ ഒരു തച്ചന്റെ കയ്യൊപ്പ്..!!
ക്ഷേത്രത്തില് നിന്നും പുറത്തിറങ്ങി, കൂടെ പടം പിടിച്ച വിദേശികളുടെ കയ്യില് നിന്നും പണം വാങ്ങുന്ന സന്യാസിമാരുടെ മുന്പിലൂടെ നടന്ന് ഞങ്ങള് ഭക്ഷണം കഴിക്കാനായി ഹംപി ബസാറിലെ ഏറ്റവും പേരുള്ള "മാന്ഗോ ട്രീ" എന്ന ഹോട്ടലിലെക്ക് പോയി... അവിടെയും കൂടുതല് വിദേശികള് തന്നെ...!! ചെറിയ ഹോട്ടല് മോശമില്ലാത്ത ഭക്ഷണം..!! ഹംപി ബസാറില് സസ്യാഹാരവും മുട്ടയും മാത്രമേ കിട്ടൂ... മാംസാഹാരം തീരെ ലഭ്യമല്ല..!! ഊണ് കഴിഞ്ഞു ഞങ്ങള് മുറി അന്വേഷിച്ചു ഇറങ്ങി...!! ആയിരത്തി അഞ്ഞൂറ് രൂപക്ക് ഒരു മുറി തരപ്പെട്ടു മൂന്ന് പേര്ക്കും താമസിക്കാം...!! അവശ്യ സൗകര്യങ്ങള് മാത്രം..!!
ഇനി ഒരല്പ്പം വിശ്രമം..!!
(തുടരും)
No comments:
Post a Comment