അധികം വിശ്രമിക്കാന് സമയമില്ല... കുറേയേറെ കാണാന് ഉണ്ട്, പെട്ടന്ന് തന്നെ മുറി പൂട്ടി ഞങ്ങള് ഇറങ്ങി.. വേണ്ടും ഹംപി ബസാറിന്റെ വിരിമാറിലൂടെ നടന്നു... നേരെ തുംഗഭദ്ര നദിയുടെ തീരത്തേക്ക്... അവള് അതീവ ശാന്തയായി കാണപ്പെട്ടു, എന്നാല് അവളുടെ ഗര്ഭത്തില് ഒളിച്ചിരിക്കുന്ന അപാര ചുഴികളെ കുറിച്ച് അപകട മുന്നറിയിപ്പുകള് അങ്ങിങ്ങായി കാണാം..!! തീരം എന്ന് പറയുന്നത് മിനുസമുള്ള വലിയ പാറയാണ്... അതില് തുണിയലക്കി കുളിക്കുന്ന ഒരുകൂട്ടര്... കുറെപേര് കുട്ടവഞ്ചിയില് നദിയിലൂടെ സഞ്ചരിക്കുന്നു... തീരത്തോട് ചേര്ന്ന് നീളത്തില് ഒരു കല്മണ്ഡപവും..കുറച്ചു നേരം അവിടെ ഇരുന്നതിനു ശേഷം ഞങ്ങള് വീണ്ടും നടന്നു...!!
പോവുന്ന വഴിയിലെല്ലാം വിട്ടാള ക്ഷേത്രത്തിലേക്കുള്ള വഴി കാണിച്ചു കൊണ്ടുള്ള ബോര്ഡുകള്.. ഞങ്ങളുടെ മുറിയില് നിന്നും ഏതാണ്ട് 2 കിലോമീറ്റര് നടക്കാനുണ്ട് ആ ക്ഷേത്രത്തിലേക്ക്... കുറച്ചു നടന്നപോഴേക്കും എല്ലാരും തളര്ന്നു.. തലയ്ക്കു മീതെ ഒരു ദയയും ഇല്ലാതെ കത്തി ജ്വലിച്ച സൂര്യന് ഞങ്ങളെ ധാരാളം വെള്ളം കുടിപ്പിച്ചു...!! പാറകൊണ്ട് പണിത വഴിയിലൂടെ നടന്നു ഞങ്ങള് ഒടുവില് പ്രധാന പുഷ്കരണിയില് എത്തി..!! പുഷ്കരണി എന്നാല് കുളമാണ്... നടുവില് ഒരു മണ്ഡപം, ചുറ്റിലും കരിങ്കല് പടവുകള്..!! പക്ഷെ, ഈ സമയത്ത് പുഷ്കരണിയില് ആവശ്യത്തിനു വെള്ളം ഉണ്ടായിരുന്നില്ല..ഉള്ളത് തന്നെ ആവശ്യത്തിലധികം മലിനമായിരിക്കുന്നു... ഞങ്ങള് വീണ്ടും നടന്നു...
കുറച്ചു കൂടെ നടന്നപ്പോള്, ഹംപിയിലെ പ്രധാന സ്ഥലങ്ങളില് ഒന്നായ കിങ്ങ്സ് ബാലന്സില് എത്തി... രാജാവിനെ തുലാഭാരം തൂക്കുന്ന സ്ഥലമാണ് അത്... അതിന്റെ ശേഷിപ്പുകളായി ചങ്ങലകെട്ടാന് വേണ്ടുന്ന കൊളുത്തുകളോടു കൂടിയ കരിങ്കല് തൂണുകള് നിലനില്ക്കുന്നു... തൊട്ടടുത്ത് കിടക്കുന്ന വിട്ടാള ക്ഷേത്രം നാളെ കാണാം എന്ന് കരുതി ഞങ്ങള് തിരിച്ചു നടന്നു.. അടുത്തത് അച്ചുതരായ ക്ഷേത്രമാണ്...പുഷകരണി വഴി തന്നെ തിരിച്ചു പോവണം.. കല്ത്തൂണുകള് നിരന്നിരിക്കുന്ന പുഷ്കരണിയുടെ അരികിലൂടെ ഞങ്ങള് ക്ഷേത്രത്തിലേക്ക് നടന്നു.. പാതി ക്ഷയിച്ച ഒരു ഗോപുരവും കടന്ന് ഞങ്ങള് അകത്തു കയറി...മേല്ക്കൂര നഷ്ടമായ തൂണുകളും കൊത്തു പണി കൊണ്ട് സമ്പന്നമായ ക്ഷേത്ര വളപ്പും ഇവിടത്തെ പ്രത്യേകതയാണ്...!! അല്പ്പ നേരം അവിടെ ചിലവിട്ടു ഞങ്ങള് തിരിച്ചു കാറിനടുത്തേക്ക് പോയി...!!
ഇനി പോവനുള്ള സ്ഥലങ്ങള് അല്പ്പം ദൂരെയാണ്, ആദ്യം അണ്ടര്ഗ്രൌണ്ട് ടെമ്പിള് എന്ന ക്ഷേത്രത്തിലേക്ക്... ക്ഷേത്രത്തിന്റെ മുക്കലും ഭൂമിക്കടിയിലാണ് എന്നതാണ് ഇവിടത്തെ പ്രത്യേകത...!! കൂടുതല് കൊത് പണികള് ഒന്നുമില്ല... ശ്രീകോവിലിലേക്ക് നടന്നു പോവാന് കഴിയില്ല.. അവിടെ വെള്ളം മൂടിയിരിക്കുന്നു... അത് വളരെയധികം മലീമസമായിരിക്കുന്നു..!! അത് കഴിഞ്ഞു ഞങ്ങള് പോയത് ഹസാരരാമ ക്ഷേത്രത്തിലെക്കായിരുന്നു..!! വിട്ടാലക്ക് ശേഷം എനിക്ക് ഏറ്റവും ഇഷ്ടമായത് ഈ ക്ഷേത്രമാണ്..!!
കൊത്തുപണികള് കൊണ്ട് സമ്പുഷ്ടമായ ക്ഷേത്രം, രാമായണത്തിലെ അദ്ധ്യായങ്ങള് അവിടത്തെ ചുവര്കളില് മനോഹരമായി കൊത്തിവച്ചിരിക്കുന്നു...!! എന്റെ ക്യാമറ നിലക്കാതെ പ്രവര്ത്തിച്ചു കൊണ്ടിരുന്നു..!! ഹംപി സന്ദര്ശിക്കുന്നവര് ഒരിക്കലും ഇവിടം സന്ദര്ശിക്കാതെ തിരിച്ചു വരരുത്..!!
അവിടെ നിന്നും പിന്നെ പോയത് ലോട്ടസ് മഹലിലെക്കും പിന്നെ എലഫന്റ്റ് സറ്റാബള് എന്ന ആനക്കോട്ടയിലെക്കും ആയിരുന്നു... ഇത് രണ്ടും സുല്ത്താന്മാരുടെ സംഭാവനയാണ്..!! ഇതിനു രണ്ടിനും മുന്പില് ചിത്രം വരയ്ക്കാന് ഇരിക്കുന്ന ഒരു കൂട്ടം ചിത്രകലാ വിദ്യാര്ത്ഥികളെ കണ്ടു.. അധികമാരെയും ശല്യപെടുത്താതെ ഞങ്ങള് അടുത്ത കേന്ദ്രത്തിലേക്ക്,
വിശാലമായ മൈതാനം, അതിന്റെ അറ്റത്ത് രാജാവിന് പ്രജകളെ കാണാന് വേണ്ടിയുള്ള വലിയ കരിങ്കല് മേട, കിങ്ങ്സ് എന്ക്ലോഷര്..!! മൈതാനത്തില് മറ്റൊരു ഭൂഗര്ഭ ക്ഷേത്രം കൂടി... പിന്നെ ഹംപിയിലെ ഏറ്റവും പ്രധാനപ്പെട്ട മനോഹരമായ പുഷ്കരണിയും...!! സൂര്യാസ്തമയം ഇവിടെ നിന്ന് തന്നെയാവാം എന്ന് നിശ്ചയിച്ചു... !! കുറച്ചു കൂടെ സമയം ഉണ്ട്... വിലപ്പെട്ട സമയം പാഴാക്കാതെ ഞങ്ങള് തൊട്ടടുത്ത ക്യൂന്സ് ബാത്തിലേക്ക്...!!
പഴയ രാജ്ഞിയുടെ കുളിപ്പുരയാണ് ക്യൂന്സ് ബാത്ത്...കുളിസീന് നാടുകാര് കാണാതിരിക്കാന് നാല് ചുമരുകളും അതില് പടികളും കൂടാരവും ഉള്ള ഒരു സുന്ദരന് കുളിപ്പുര, ഇന്ന് പക്ഷെ അവിടെ വെള്ളമില്ല...ചുമരില് നിറയെ സഞ്ചാരികളുടെ പേരുകള് കല്ലുകൊണ്ട് വരഞെഴുതി വൃത്തികേടാക്കി വച്ചിരിക്കുന്നു...!! ഞങ്ങള് തിരിച്ചു കിങ്ങ്സ് എന്ക്ലോഷറിലേക്ക് പോയി...!! ആ വലിയ സ്റ്റേജിന്റെ മുകളില് കയറി... സൂര്യന് അസ്തമിക്കാറായി...!!
ഞാന് ട്രൈപോഡ് തയ്യാറാക്കിയപോഴേക്കും ഗാര്ഡ് ഓടി വന്നു.. അവിടെ ട്രൈപോഡ് പാടില്ലത്രേ...!! വിചിത്രമായ നിയമം... അതിനുള്ള കാരണം ചോദിച്ചിട്ട് അങ്ങേര്ക്കു വലിയ പിടിയില്ല..!! ട്രൈപോഡ് ഉപയോഗിക്കാന് പ്രത്യേകം കാശു കൊടുത്തു അനുമതി വാങ്ങണം...!! കഷ്ടം..!! ബോധമില്ലാത്തവര് ഉണ്ടാക്കിയ ഒരോ നിയമങ്ങള്...!! അസ്തമിക്കാന് തുടങ്ങിയ സൂര്യനോട് പരിഭവം പറഞ്ഞുകൊണ്ട് ഞാന് കുറച്ചു പടമെടുത്തു...!! ചക്രവാളത്തില് ചെംചായം പൂശി സൂര്യന് താഴ്ന്നിറങ്ങി..!!
റൂമിലെത്തി കുളിച്ചു വൃത്തിയായി ഞങ്ങള് ബാസാറിലേക്കിറങ്ങി, ഇനി ഭക്ഷണം കഴിക്കണം....ചില്ഔട്ട് എന്ന ഒരു ഹോട്ടലില് കയറി, നല്ല ഭക്ഷണം വലിയ കത്തിയല്ലാത്ത ബില്ലും..!! തിരിച്ചു റൂമിലേക്ക്, ക്ഷീണം ഉള്ളത് കൊണ്ട് ഉറങ്ങാന് പണിപ്പെട്ടില്ല..!! പിറ്റേന്ന് രാവിലെ പുലര്ച്ചക്ക് എഴുന്നേറ്റു മതംഗ ഹില്ല്സ് കയറണം, ഉദയം കാണാന്..!!
(തുടരും)
No comments:
Post a Comment