ഈ വര്ഷത്തെ അവസാനത്തെ രാത്രി ലാ ട്രെക്കെര്സ് എന്ന എന്റെ സൗഹൃദ കൂട്ടായ്മയുടെ കൂടെ ആഘോഷിക്കാന് നേരത്തെ തീരുമാനിച്ചതാണ്... തീരുമാനം തെറ്റിക്കാതെ ഞാനും കൂട്ടരും അതില് പങ്കെടുക്കാന് എത്തി... പതിവ് മദ്യപാനവും, ചിക്കനും ഒക്കെയായി അത് തുടങ്ങി, തുടര്ന്നു...!!
കൂട്ടത്തില് ഒരാള് മാത്രം കുറവ്..!!
"ഛെ..!! അവന് കൂടെ വേണായിരുന്നു...!!", ഓരോരുത്തര് ആയി പരിഭവം പറയാന് തുടങ്ങി..!!
"ശരി, എന്നാ അവനെ ഒന്ന് വിളിച്ചു നോക്കെടാ..."
കൂടെ ഒരുത്തന് ഫോണില് തോണ്ടി അവനെ വിളിച്ചു...
"മച്ചാനെ നീ എവിടെയാ..??"
"അളിയാ ഞാന് പള്ളിയിലാ... വൈഫിന്റെ നിര്ബന്ധം...പെട്ടളിയാ....!!"
"നാറ്റിച്ചല്ലോ മച്ചാനെ... പള്ളിയില് എന്നതാ...???"
"ഇനി അങ്ങോട്ട് കര്ത്താവിനെ വിളിച്ചാലേ രക്ഷയുള്ളൂ...!!" അവന് ഒരു "അപ്പി" ന്യൂ ഇയര് ആശംസിച്ച് ഫോണ് വച്ചു...
അവന് ഫോണ് വച്ചതും, വിളിച്ചവന് ബാക്കി ഉള്ളവരോട് കാര്യം വിളമ്പി... കര്ത്താവിനെ വിളിക്കാന് പോയ കാര്യമുള്പ്പടെ...!!
അത് കേട്ടയുടന് മ്മടെ പഴയ സഹമുറിയന്, "ന്നാ പിന്നെ കര്ത്താവിനെ ഇങ്ങോട്ട് വിളിക്കായിരുന്നു..." (അപ്പോഴേക്കും പെഗ് നാലെണ്ണം ഗ്ലാസിലും അവിടെ നിന്ന് വയറ്റിലും എത്തിയിരുന്നു...)
മിനുട്ട് വച്ച് വേറെ ഒരുത്തന് സ്കോര് ചെയ്തു, "ഒന്ന് പോടാപ്പാ..!! കര്ത്താവ് കാലനെ പോലെ പോത്തുംപുറത്ത് നടക്കുകയല്ലേ വിളിച്ച സ്ഥലത്ത് എത്താന്... പുള്ളിയെ, അവിടെ കുരിശിമ്മേല് പിടിച്ചു ആണി അടിച്ചു ഒറപ്പിച്ചു വച്ചിരിക്കുകയല്ലേ....!! അനങ്ങാന് പറ്റണ്ടേ...!! നമ്മള് പോവണ്ടിടത്തു നമ്മള് തന്നെ പോണം"
ഈ രാത്രിയില് കുറെ സ്ഥലങ്ങളില് മദ്യം ഒഴുകി... കുറെ പടക്കം പൊട്ടി... കുറെ കോഴികള്ക്ക് വേവും മസാലയും ചേര്ന്നു....കുറെ പേര് ആരാധനാലയത്തില്...മൊബൈലില് കോളിന്റെയും മെസ്സേജിന്റെയും എരിപൊരി സഞ്ചാരം...ആശംസകള് കൊണ്ട് പള്ള നിറഞ്ഞ് ഫേസ്ബുക്കും...അടുത്ത വീട്ടിലെ സര്ക്കാര് സ്കൂളില് പഠിക്കുന്ന കുട്ടിക്ക് പുസ്തകം പൊതിയാന് വിധിക്കപ്പെട്ട് കഴിഞ്ഞ വര്ഷത്തിലെ കലണ്ടര്..!!
മാറ്റമൊന്നും ഇല്ലാതെ നാളെയും പുലരും, സൂര്യന് കിഴക്ക് തന്നെ ഉദിക്കും...ആഘോഷിക്കാന് ഇനിയൊരു കാരണം അന്വേഷിച്ച് ഞാനടക്കം പരക്കം പായും....!! ഒരുകാര്യം നമ്മളെ അപ്പോഴും ഓര്മ്മപ്പെടുത്തും, കൂട്ടുകാരന്റെ ഡയലോഗില് എന്റെ ഒരു ഏച്ചുകൂട്ടല് (മുഴച്ചിരിക്കുമോ), "നമ്മള് പോവണ്ടിടത്തു നമ്മള് തന്നെ പോണം.... നമ്മള് ചെയ്യേണ്ടത് നമ്മള് തന്നെ ചെയ്യണം"
No comments:
Post a Comment