Tuesday, February 18, 2014

1983 ഉം ഓശാനയും

അടുപ്പിച്ചുള്ള രണ്ട് ദിവസങ്ങളില്‍ രണ്ട് പടം കണ്ടു, 1983 ഉം ഓം ശാന്തി ഓശാനയും... രണ്ടും കാണുന്നതിനു മുന്‍പ് കേട്ടറിഞ്ഞത് 1983 കിടിലന്‍ എന്നും ഓശാന അത്ര പോര എന്നും... കണ്ടാലല്ലേ സ്വയം അഭിപ്രായം ഉണ്ടാകൂ എന്നത് കൊണ്ട് രണ്ടും പോയി കണ്ടു... വെവ്വേറെ അനുഭവം എഴുതുന്നതിനു പകരം ഒറ്റ കുറിപ്പില്‍ അവസാനിപ്പിക്കുന്നു ഇത്തവണ, താരതമ്യം ഒരു ശരിയായ നിരൂപണ മാര്‍ഗം അല്ല എന്നറിയാം... എന്നാലും എഴുതുന്നത്‌ നിരൂപണം അല്ലാത്തത് കൊണ്ട് ഇപ്പൊ അതാവാം...

കഥ/തിരക്കഥ:-
1983 യുടെ കഥ മലയാള സിനിമയില്‍ കണ്ടു പരിചയമുള്ള ഒന്നല്ല... സച്ചിന്‍ ആരാധകരെ കോരിത്തരിപ്പിക്കുന്ന രീതിയില്‍ അബ്രിദ് എഴുതിയ കഥ എനിക്ക് ഹൃദ്യമായി തന്നെ അനുഭവപ്പെട്ടു... തമാശയെന്ന പേരില്‍ കാണിക്കുന്ന പേക്കൂത്തുകള്‍ ഇല്ല എന്നത് തന്നെ ഒരു കാരണം... ഒരു നാട്ടിപുറത്തെ വീട്ടിലും സൗഹൃദ സദസ്സിലും പറയുന്ന നുറുങ്ങു തമാശകള്‍ ആണ് ഈ കഥയുടെ ആണിക്കല്ല്...ക്രിക്കറ്റ് എന്ന പശ്ചാത്തലം പൂര്‍ണ്ണമായും നിലനില്‍ക്കുന്നു, അത് നന്നായി ഉപയോഗിച്ചിരിക്കുന്നു...
ഒശാനക്ക് അവകാശപ്പെടാന്‍ ഒരു വ്യത്യസ്ഥമായ കഥാതന്തു ഇല്ല എന്നത് ഒരു കുറവായി കാണാത്ത വിധം അതിന്‍റെ ഒരുക്കി എന്നതാണ് മിഥുന്‍ ഒരുക്കിയ തിരക്കഥയുടെ വിജയം...തമാശകള്‍ ഉണ്ട്, അത് നാടന്‍ നുറുങ്ങുകള്‍ അല്ല, ഇന്നത്തെ യുവ തലമുറയ്ക്ക് ആസ്വദിക്കാവുന്ന വിധം എഴുതിയ തമാശകള്‍ ആണ് ഇതിന്‍റെ നട്ടെല്ല്...പ്രണയത്തില്‍ പഴയകാല സിനിമകളുടെ നല്ല വശങ്ങള്‍ മേമ്പൊടിയായി വിതറി രസിപ്പിചിരിക്കുന്നു...എന്നാല്‍ ആ സിനിമകളെ ഓശാന പൂര്‍ണ്ണമായും ആശ്രയിച്ചില്ല താനും..

സംവിധാനം:-
പുതിയ സംവിധായകര്‍ രണ്ടും ഒന്നിനൊന്നു മെച്ചം... പക്ഷെ അവരുടെ തനതായ പ്രതിഭയറിയാന്‍ അടുത്ത പടം വരെയെങ്കിലും കാത്തിരിക്കണം.. ഇന്നത്തെ പ്രേക്ഷകരുടെ തുടിപ്പറിഞ്ഞു രണ്ടുപേരും ആദ്യ പടം ചെയ്തു...ചില്ലറ തെറ്റുകള്‍ രണ്ടുപേര്‍ക്കും ഉണ്ടായി എന്നതും വാസ്തവമാണ്...

സംഗീതം:-
ഒരുപാടു കാലം ഓര്‍ത്ത്‌ വക്കാവുന്ന മാന്ത്രിക ശക്തിയുള്ള പാട്ടുകള്‍ രണ്ടിലും ഇല്ല... എന്നാല്‍ സിനിമക്ക് വേണ്ട മൂഡ്‌ പകരാന്‍ പോന്നതും എന്നാല്‍ പ്രേക്ഷകരെ മടുപ്പിക്കാത്തതും ആയ സംഗീതം ഷാനും ഗോപിയും പകര്‍ന്നു തന്നു..

അഭിനയം:-
രണ്ടിലും ഒരേ നായകന്മാര്‍ ആണ്.. 1983 ല്‍ നിവിന്‍ പോളി തീരെ പോര... ക്രിക്കറ്റ്‌ കളിക്കുന്ന സീനില്‍ ഒഴികെ മറ്റൊന്നിലും ശരാശരി നിലവാരം പോലും കാണിക്കാന്‍ അയാള്‍ക്ക്‌ കഴിഞ്ഞില്ല.. പോരാത്തതിനു പ്രായം കാണിക്കാന്‍ വച്ച വിഗ്ഗ് ഭീകരമായിപ്പോയി...പക്ഷെ കൂടെ അഭിനയിച്ച ബാക്കി എല്ലാവരും തര്‍ത്തു... അതില്‍ ജോയ് ഏട്ടന്‍ മുതല്‍ ഗ്രിഗറി വരെ ഉള്ളവര്‍ പെടും...സ്രിന്ധക്ക് ഒരു സ്പെഷ്യല്‍ കയ്യടി...!!
ഒശാനയില്‍ നിവിന് അധികമൊന്നും ചെയ്യേണ്ടി വന്നില്ല, ഭാഗ്യം...!! ഇത് പൂര്‍ണ്ണമായും നസ്രിയ പടമാണ്...അതില്‍ നൂറില്‍ കുറഞ്ഞത്‌ തൊണ്ണൂറു മാര്‍ക്കെങ്കിലും ഞാന്‍ ആ സുന്ദരിക്ക് കൊടുക്കും...രണ്‍ജി പണിക്കര്‍ ഇത്രയും നന്നായി അഭിനയിക്കുമായിരുന്നെങ്കില്‍ എന്തിന് ഇത്രയും വൈകി...!! അഥിതി താരമായ ലാല്‍ജോസും വിനീതും വരെ തങ്ങളുടെ ഭാഗം ഭംഗിയാക്കി...!!

എന്നോട് മാര്‍ക്ക് ചോദിച്ചാല്‍ ഞാന്‍ രണ്ടിനും 4/5 കൊടുക്കും..

No comments: