Monday, February 24, 2014

ഗഞ്ചിക്ക മണക്കുന്ന ഗോകര്‍ണ്ണ തീരങ്ങള്‍(ഭാഗം രണ്ട്)

വഴിയില്‍ അധികം ആരേയും കാണാതിരുന്നത് കൊണ്ട് ഞങ്ങള്‍ക്ക് വഴിതെറ്റിയോ എന്ന് സംശയമായി.. കുറച്ചു നേരം കൂടെ നടന്നപ്പോള്‍ ചില വിദേശികളെ കണ്ടു.. അവരോടു വഴിചോദിച്ചു, തെറ്റിയില്ല എന്നുറപ്പിച്ചു...അങ്ങനെ ഏതാണ്ട് രണ്ടു കിലോമീറ്റര്‍ നടന്നു കഴിഞ്ഞപ്പോള്‍ കുഡ്ളെ ബീച്ചിലേക്ക് ഇറങ്ങാനുള്ള വഴി കണ്ടു..പലനാളായുള്ള മനുഷ്യ സഞ്ചാരം കൊണ്ട് സ്വയം ആകൃതികൊണ്ട വെട്ടുകല്‍ പടികള്‍, ഇടവഴികള്‍...നേരെ ഇറങ്ങി ചെന്നത് ബീച്ചില്‍... തീരം മുഴുവനും ബീച്ച് ഷാക്ക് എന്നറിയപ്പെടുന്ന ചെറു കുടിലുകളും  റസ്റ്റോറന്‍റ്കളും...അവശ്യ സൗകര്യങ്ങള്‍ മാത്രമുള്ള ഓലമേഞ്ഞ കുടിലുകള്‍ ആണ് ഷാക്കുകള്‍... സഞ്ചാരികള്‍ കൂടുതലും തങ്ങുന്നത് ചിലവു കുറഞ്ഞ ഇത്തരം ഷാക്കുകളില്‍ ആണ്... അതിലൊന്നില്‍ (ഓം ശാന്തി കഫെ) ഞങ്ങളും താമസിക്കാന്‍ ഉറപ്പിച്ചു... രണ്ടുപേര്‍ക്കും കൂടെ താമസിക്കാന്‍ ഒരു ദിവസം ചിലവ് വെറും 200 രൂപ..!! മണ്ണ്തറയില്‍ വിരിച്ച രണ്ട് മെത്തകള്‍, മിന്നാമിനുങ്ങ് പോലെ നുറുങ്ങു വെട്ടം തരുന്ന ഒരു സീറോ ബള്‍ബ്, ഫോണ്‍ ചാര്‍ജ് ചെയ്യാനുള്ള സൗകര്യം, കൊതുക് വല, പുറത്തുള്ള ഓല മേഞ്ഞ ബാത്ത്റൂം വരെ വിത്ത്‌ വൈഫൈ..!! പരമാനന്ദം..!!
ഷാക്കില്‍ ബാഗ്‌ വച്ചു ഒരു ചെറിയ കുളി പാസ്സാക്കി ഞങ്ങള്‍ മുന്‍പിലെ റസ്റ്റോറന്‍റ്ല്‍ പോയി ഇരുന്നു...അവിടെ ഉള്ളത് മുഴുവനും വിദേശികള്‍ ആണ്... മിക്കവരും ഹൈന്ദവ ചിഹ്നങ്ങളും ദൈവ രൂപങ്ങളും ഉള്ള പരുത്തി വേഷങ്ങളില്‍... മുടിനീട്ടി ജട പിടിപ്പിച്ചു നടക്കുന്നവര്‍, ലക്ഷ്യമില്ലാതെ എങ്ങോ കണ്ണെറിഞ്ഞു ചിന്തിച്ചിരിക്കുന്നവര്‍, ധ്യനിക്കുന്നവര്‍, വായനയില്‍ ലയിച്ചിരിക്കുന്നവര്‍, ചിത്രം വരക്കുന്നവര്‍ അങ്ങനങ്ങനെ പലകൂട്ടര്‍ ഉണ്ട്..

നല്ല വെയില്‍, കടലില്‍ നിന്നും കാറ്റടിക്കുന്നുണ്ട് പക്ഷെ അതും ചൂടാണ്..!!
"ടൂ ചില്‍ഡ് ബിയര്‍, കെ എഫ് സ്ട്രോങ്ങ്‌" എന്ന് ഓര്‍ഡര്‍ ചെയ്യാന്‍ വലിയ സമയം എടുത്തില്ല...!!
ജലകണികകളാല്‍ ആലിംഗനം ചെയ്യപ്പെട്ട ബിയര്‍ ബോട്ടിലിന്റെ വായ് വക്കില്‍ എന്‍റെ ചുണ്ടുകള്‍ അമര്‍ന്നു..ഉള്ളിലെ ഉഷ്ണത്തിന് ആശ്വാസം..!!
ഞങ്ങളുടെ പുറകില്‍ ഇരുന്ന പ്രായമേറിയ ഒരാള്‍ വളരെ പരസ്യമായി തന്നെ റോളിംഗ് പേപ്പറില്‍ കഞ്ചാവ് ചുരുട്ടി കത്തിച്ചു വലി തുടങ്ങി..!!ഒരു  കൂസലും  ഇല്ലാതെ...പിന്നെ  പിന്നെ  ഇതൊരു  പതിവ്  കഴ്ച്ചയായി...അവിടെ  പ്രായവും  ലിംഗവും  രാഷ്ട്രവും ഒന്നും അതിരുകളായില്ല... ഗഞ്ചാ  ഗോകര്‍ണ്ണയുടെ  ആത്മഗന്ധമാണ്  എന്ന്  ഞാന്‍ മനസിലാക്കാന്‍ തുടങ്ങി..!!

അത്യാവശ്യം ഭക്ഷണവും കഴിഞ്ഞു ക്യാമറയും തൂക്കി ഞങ്ങള്‍ നടക്കാന്‍ തുടങ്ങി... ഓം ബീച്ച് ആണ് ലക്ഷ്യം..!! കുഡ്ളെ കഴിഞ്ഞു, ഒരു ചെറിയ കുന്നും താണ്ടി വേണം അങ്ങെത്താന്‍... അത് വഴി നടന്നു കയറി ഇറങ്ങി ചെല്ലുമ്പോള്‍ "ഓം" (മലയാളത്തില്‍ അല്ല) എന്ന ആകൃതിയില്‍ ഒരു കടല്‍ തീരം... അതാണ് ഓം ബീച്ച്...ഇവിടെ വിദേശികള്‍ മാത്രമല്ല ഇന്ത്യക്കാരും ഒരുപാടുണ്ട്.. കൂടുതല്‍ ആളുകള്‍ സന്ദര്‍ശിക്കുന്നത് ഇവിടെയാണ്... ഒരു നല്ല സായാഹ്നം  ക്യമറയിലും മനസിലും പകര്‍ത്തി ഞങ്ങള്‍ ഇരുളാന്‍ തുടങ്ങിയ ആ അപരിചിത പാതയിലൂടെ തിരിച്ചു നടന്നു...!! കൂടുതല്‍ ശാന്തമായ കുഡ്ളെയിലേക്ക് തന്നെ..!!

തിരിച്ചെത്തിയപ്പോഴേക്കും റസ്റ്റോറന്‍റ്കളില്‍ അലങ്കാര വിളക്കുകള്‍ തെളിഞ്ഞിരുന്നു.. ചില്ലു വിളക്കുകളിലെ ആ മങ്ങിയ നിറ വെളിച്ചം, കടലിന്‍റെ താളത്തില്‍ ഉള്ള ഇരമ്പലുകള്‍, കടല്‍ത്തീരത്ത്‌ വട്ടമിട്ടിരുന്നു  വിദേശികള്‍ കെട്ടഴിച്ചു വിട്ട പാശ്ചാത്യ സംഗീതം, കാറ്റില്‍ ഇഴുകി ചേര്‍ന്ന ഗഞ്ചാ മണം...!! എല്ലാം കൂടെ ആ രാത്രിക്ക് ഇരട്ടി പൊലിമയേകി...!!

 അത്താഴം കഴിഞ്ഞു കിടന്നയുടനെ ഉറക്കത്തിലേക്ക് വഴുതി... പാതി രാത്രിയില്‍ എന്‍റെ കാല്‍ ചുവട്ടില്‍ എന്തോ അനക്കം അനുഭവപ്പെട്ടു...മൊബൈലിന്റെ വെളിച്ചത്തില്‍ എന്‍റെ കാല്‍ചുവട്ടില്‍ ഒരു പട്ടി കിടന്നുറങ്ങുന്നത് കണ്ടു.. അത് എന്‍റെ കിടക്കയുടെ കാല്‍ ഭാഗം കൈവശപ്പെടുത്തിയിരിക്കുന്നു...!! പെട്ടന്ന് എഴുന്നേറ്റു ലൈറ്റ് ഇട്ടു... അപ്പോഴാണ് കണ്ടത്, ഒന്നല്ല രണ്ടെണ്ണം ഉണ്ട്.. ഷാക്കിന്റെ വിടവിലൂടെ അകത്തു കയറിക്കൂടിയതാണ്...രണ്ടിനെയും ഞാന്‍ ഇറക്കി വിട്ടു കതകു മുറുക്കിയടച്ചു..!!ഹല്ല പിന്നെ..!!

പിറ്റേന്ന് രാവിലെ എഴുന്നേറ്റു പുറത്തു നോക്കിയപ്പോള്‍ മിക്ക വിദേശികളും വ്യായാമത്തിലും യോഗയിലും എല്ലാം മുഴുകിയിരിക്കുന്നു...കുളിച്ചൊരുങ്ങി ബാഗെടുത്തു  ഞങ്ങള്‍ ആ തീരത്തോട് യാത്രചോല്ലി.. തീര്‍ച്ചയായും ഇനിയും വരും എന്ന മനസ്സുമായി...!!

No comments: