"ഡാ..നീ വീട്ടില്ക്ക് വാ...ഫുഡ് അവിടുന്നാവാം..!!" മനോജേട്ടന്റെ ക്ഷണം,
വേണ്ടാന്ന് വച്ചില്ല... രമ്യ ചേച്ചിയുടെ വക നല്ല ഭക്ഷണത്തിനുള്ള ക്ഷണം മനോജേട്ടന്റെ രൂപത്തില് വന്നതാണ്... ജാട കാണിച്ചാല് അത് ആ വഴിക്ക് പോവും...വേണ്ടാന്ന് വച്ച കുളി ഉണ്ടെന്ന് വരുത്തി കളര്ഫുള് ഡ്രസ്സ് ചെയ്തു ബൈക്കും സ്റ്റാര്ട്ട് ചെയ്തു നേരെ വച്ച് പിടിച്ചു...!! പോണ വഴിക്ക് ഓര്മ്മ വന്നത് പഴയ ഒരു കഥയാണ്,
കുറച്ചു കാലം മുന്പ്, ഇത് പോലെ മറ്റൊരു ക്ഷണം ഉണ്ടായി... മനോജേട്ടന്റെയും രമ്യചേച്ചിയുടെ മകള് അമ്മുവിന്റെ പിറന്നാളിന്... അന്നത്തെ സ്പെഷ്യല് ബിരിയാണിയാണ് എന്ന് അറിഞ്ഞതും ഞാന് സമയം കളഞ്ഞില്ല, ഇലക്ട്രോണിക് സിറ്റിയിലെ അവരുടെ വീട്ടില് ഞാന് ഹാജര്... മനോജേട്ടന് പുറത്തു ഷോപ്പിങ്ങിനു പോയതാണ് എന്ന് രമ്യചേച്ചി പറഞ്ഞു...അത്യാവശ്യം പോസ്റ്റ് ആയതിനു ശേഷം ആ മഹാന് ആഗതനായി, ഒരു കൂട്ടം വീട്ടു സാധനങ്ങളുമായി..!! അതില് ഒന്നിന്റെ പേര് മാജിക് മോപ്... മലയാളത്തില് പറഞ്ഞാല് മാന്ത്രിക ചൂല്... ചൂലിന് ഇന്നത്തെ ആപ്പ് വിലയൊന്നും അന്നില്ല... എന്നിട്ടും അഞ്ഞൂറിന്റെ ഗാന്ധി കൊടുത്തു ആ സംഗതി വാങ്ങാന് ഒരു കാരണം മാത്രം... പരസ്യം...!! തറയില് വീണ കടുത്ത കറകള് ഈ പറഞ്ഞ സാധനം വച്ച് തൈര് കടയുന്നത് പോലെ നാലു തവണ വട്ടം കറക്കി ആ മദാമ്മ എത്ര തവണ നിലം കവടിയാര് കൊട്ടാരം പോലെ മിനുക്കി എടുത്തിരിക്കുന്നു...!!
വീട്ടിലെത്തി മനോജേട്ടന് മോപ്പിന്റെ കവര് വലിച്ചൂരി... ഇനി ആദ്യ പരീക്ഷണം ആണ്... അടുക്കളയില് ചൂടാറാന് കാത്തിരുന്ന ചായ എടുത്തു താഴെ ഒഴിച്ചു... മോപ്പെടുത്തു കുത്തി അഞ്ചാറു തവണ കടഞ്ഞു നോക്കി... ഒരു സ്കൊയര് മീറ്ററില് ഒഴിച്ച ചായ ഇപ്പൊ പത്തു സ്കൊയര് മീറ്ററില് പരന്നിരിക്കുന്നു... മോപ്പിനു വലിയ മാറ്റമില്ല... നിലത്തിനു നല്ലത് പോലെ ഉണ്ട് താനും...!! വലിയ തെറ്റില്ലാതെ ഇരുന്ന നിലത്തില് ഇപ്പൊ ചായകൊണ്ട് ആഫ്രിക്കന് ഭൂപടം തെളിഞ്ഞിരിക്കുന്നു....!! നിലമാകെ പരന്നിരിക്കുന്ന ചായക്കറയേയും മനോജേട്ടനെയും രമ്യചേച്ചി മാറി മാറി നോക്കി... രമ്യചേച്ചിയുടെ കണ്ണുകള് ചുവന്നതാണോ അതോ എനിക്ക് തോന്നിയതാണോ...??? അടുക്കളയില് നിന്നും മൂലയില് ഉണങ്ങാന് ഇട്ടിരുന്ന പഴംതുണി എടുത്തു വന്ന് രമ്യ ചേച്ചി തന്നെ നിലം വൃത്തിയായി തുടച്ചു മുഖം വെട്ടിച്ചു തിരിച്ചു പോയി... വെറുതേ ടി വി യിലെ ചാനല് മാറ്റിയപ്പോള് അതില് ഒന്നില് ഇങ്ങനെ കേട്ടു
"നിങ്ങളുടെ വീട്ടിലെ തറയിലെ കടുത്ത കറകള് തുടച്ചെറിയാന് ഇതാ മാജിക് മോപ്....!!" മനോജേട്ടന്റെ കയ്യില് ഇരുന്നു റിമോട്ട് വിറകൊണ്ടു...!!
ആ ഫ്ലാറ്റിന്റെ ഏതോ മൂലയില് ഇന്നും ആ "കോപ്പ്" അന്ത്യ വിശ്രമം കൊള്ളുന്നു...!!
പിന്കുറിപ്പ്: ഇന്ന് കഴിച്ച ചോറിന്റെയും മീന്കറിയുടെയും ആയില വറുത്തതിന്റെയും നന്ദി ഇവിടെ പ്രകാശിപ്പിക്കുന്നു
No comments:
Post a Comment